|
Euskal Herriko bazter guztietara hedatzen ari dira egunotan abenduaren 3ko ekimenak. Hainbat erakundek eta elkartek bat egingo dute Euskararen Egunarekin eta askotariko ekimenak antolatu dituzte. Instituzio guztiek txolotzen dute egun Euskararen eguna, "Euskara guztiona da, guztion ondarea da" diote, eta hala da baina, eguneroko praktikek euskaldunok bigarren mailako herritarrak garela erakusten digute. Horregatik, euskara museoetako bitrinetan "babestua" izan nahi duten agintarien aurrean, normalkuntza osoaren aldarrikapena aterako dute kalera hainbat elkarteek egunotan. Abenduaren 3an bertan Barakaldoko Gazte Asanbladako kideak 19:00etan elkartuko dira Bagatzako plazan euskararen aldeko ekimen bat burutzeko. Sasiburuk berriz, abenduaren 2an, arratsaldeko 19:00etan BUAH TXABAL antzezlana ekarriko du San Juan kaleko Gazte Bulegora, Barakaldoko Gazte Bulegoa eta Topagunearen laguntzaz. Bilboko euskalgintzak ere makina bat ekimen antolatu du.
BILBOKO EUSKALGINTZAREN ADIERAZPENA
Euskararen Gizarte Erakundeen Kontseiluak Bilboko Udaleko hizkuntza-politikaren neurketaren emaitzak jakinarazi berri ditu. Emandako datuak ikusita, garbi dago Bilbon euskararen normalizazioa izango bada, egin beharreko bidea luzea dela oraindik.
Bilbon, biztanleen % 40 baino gehiago euskalduna edo ia-euskalduna da; Bilbon 90.000 euskal hiztun baino gehiagok bizi eta lan egiten dugu; Bilbo da Euskal Herrian euskaldun kopuru handiena biltzen duen gunea. Gauzak horrela, eta euskarak estatus ofiziala izanda, ezin gara pozik egon azken 4 urteotan Udalak hartutako neurriekin; izan ere, aurrerapenik izan bada, ezin txikiagoak izan dira ia arlo guztietan.
Baionarekin batera, euskararen ordenantzarik ez duen Euskal Herriko hiriburu bakarra da Bilbo. Udalaren erabilera planean aurrerapauso ga rbirik ez da izan; udal-langile berri guztiak euskaldunak izan daitezen ez dago erabakirik. Euskara ikasteko dirulaguntzetan aurrera baino, atzera egin dugu, aurten oinarrizko errenta kobratzen dutenei laguntza kendu baitie. Euskarak izan duen aurrekontua % 0,51 izan da, euskarak dituen beharrak asetzeko ez-nahikoa, dudarik gabe. Ez da kasualitatea Bilbo 43. postuan agertzea 2010eko udalerrietako hizkuntza-politikaren neurketaren rankinean.
Datorren maiatzaren 22an udal hauteskundeak izango dira, eta herritarrok bozkatutakoaren arabera eratuko da datozen 4 urteetan udal politika guztien ardura izango duen taldea. Hizkuntza politika eragingarria izateko, bi motako neurriak garatu behar dira derrigorrean: sustapenerako neurriak, batetik; eta hizkuntza-eskubideen bermerako arauzko neurriak, bestetik. Beraz, Bilboko euskalgintzako kideok ezinbesteko jotzen dugu, Kontseiluak egindako neurketaren emaitzen ondorioak aintzat hartuta, honako arlo hauetan benetako aurrerapausaoak ematea:
- Bilbok Euskararen-ordenantzak behar ditu.
- Euskarak, krisi garaian bagara ere, aurrekontu handiagoa behar du.
- Euskara ikasteko dirulaguntzek unibertsalak behar dute.
- Hiriko esparru guztietan erabilera eta sustapen plan eragingarriak jarri behar dira abian.
- Udalak erabilera plana berrikusi behar du, bertan langile guztiek parte hartu behar dute eta kontratatu berri guztiak euskaldunak izateko erabakia hartu behar du.
- Udalak diruz laguntzen dituen entitate guztiei hizkuntza-irizpiderik ezarri behar die, hala nola, udalaren azpikontrateei.
- Amaitzeko, Bilboko euskalgintza aintzat hartuta, Udalak Euskara Biziberritzeko Planean parte hartzeko bide eman behar die nahi duten eragile guztiei, horretarako Planak berak aurreikusten dituen jarraipen batzordeak eratuz eta konbokatuz.
Ondorioz, Bilbon, eta, beraz, Euskal Herrian, euskararen normalizazioan benetako aurrerapausoak emango baditugu, bertoko alderdi politiko guztiei dei egin nahi diegu aipatutako arloak jorratzeko konpromiso irmoa har dezaten.
Bilbon, 2011ko maiatzaren 19an
|
http://sestaokogazteasanblada.org/spip.php?article87