Portugaleteko herri mugimenduko kolektibo ezberdinek gaur atsaldeko 19.30etan Barakaldon murrizketen kontra egingo den manifestaziorako deialdia luzatu dute eta bertara atxikitu dira Portugaleteko Orube plazan eginiko agerraldiaren bidez. Bertan eskualdearen egoera sozioekonomikoa salatu eta kalera irteteko garaia dela adierazi dute. Honako hauek izan dira atxikitutako kolektiboak: Langabetuen asanblada, Marasma, Birportu, Herrikoi auzo elkartea, Portugalete zaharra auzo elkartea, Pentsionistak, M-15-M, Gazte independentistak, Andere Bidatz talde feminista eta Gazte berdeak. Ezkerraldeko Ezker Abertzaleak ere agerraldia eskeini du. Egoera sozioekonomiko kezkagarria hau gainditu dezakegula baieztatu dute bozeramaleek: "Horretarako, beharrezkoa da, akordioak lortzea; akordio politikoak, akordio sindikalak eta akordio sozialak; justizia sozialean oinarrituko den eredu alternatibo berri baterantz jotzeko beharrezkoa den botere politikoa lortzeko". Kalean eskubideak aldarrikatzera deitu dituzte herritarrak, gaurko manifestaziorako deia indartu nahian.

Prentsa oharra

Ezkerraldea, historikoki, Euskal Herriko langileen borroka eta konkisten sorlekua izan da, baina aldi berean, bankari, enpresaburu eta politikari ustelen arpilatze eta esplotazioek eragindako  prekarietate eta desegituraketaren sorlekua izan da.

Zergatik diogu hori? Galde diezaiogun Santurtziko Amaia Goikoetxeari, 5 urteko semea duen ama dibortziatuari; hipoteka ez ordaintzeagatik bere etxea enkantean atera zuten, etxea ordaindu edota semeari jaten eman artean aukeratu behar izan zuen. Edo galde diezaiegun Barakaldoko Blue Rise arropa dendako langileei; urtarrilaren bukaeran, enpresa berak, gauez joan eta bere denda hustu eta garbitu nahi izan zuen, horrela, langileek, hurrengo egunean, bueltatzerakoan saltzeko gairik eduki ez eta denda itxi behar izan zezaten. Hori bai, abenduko eta urtarrileko lansariak ordaintzeke zeuden. Edota ABBko 240 langileei; azken hiru urteetan 100 milioi baino gehiagoko irabazia izanik, ( 30 milioi azken urtean), enpresak ateak itxi ditu zikoiztasunagatik. Bere produkzioa Turkiara bidali du, zuzeneko eta zeharkako ehunka lanpostu suntsituz eta Ezkerraldeko ehunka familien geroa kolokan jarriz. Eta ikasketa tituluak biltzen ari den gazte santurtziar horri galdetzen badiogu? Ikasi eta ikasi ari den bitartean gurasoen etxean bizi eta Ikeako kontratu prekario eta zikin baten zain dagoen gazteari. Ez, hobe gurasoak langabezian dauden Barakaldoko familiari galdetzen badiogu. Amak okindegia itxi behar izan zuen, eta aitak lan egiten zuen azpikontrata ere itxi egin zen, Sestaoko La Navalek lana murriztu zuelako. Familia honi, udal gobernuak bizirauteko beharrezko laguntzak ukatu dizkio aurrekontuetan dirurik ez dagoelako, bitartean, bertako alkatea diru publikoa alferrikako xahupenetan eralgitzen ari da.

Beraien sistemaren krisia ikusteko adibide hauek ez badira izan nahikoa, hemen ditugu datu hauek. Ezkerraldean ia 20.000 langabetu daude. Gazteen artean portzentajeak gorantz jotzen du, ondorioz, belaunaldi berriak etorkizun lausora halabeharrez bideratua daude. 40.000k baino gehiagok 900 euroko baino gutxiagoko soldata eskasak dituzte. Kontratu ez-egonkorren %60 emakumeei dagokie. Eskualdeko salgune handietan lan egiten duten 2.875ek bataz beste 500 euro kobratzen dute. 50.000 etxetan, ia biztanleen % 50 , pobrezia egoeran daude edo hilaren bukaerara iristeko zailtasunak dituzte. Hor ditugu ACB, La Naval,GAM Aldaiturriaga, Nervacero, Mebunik eta itxi edota egokitze tramitean dauden dozenaka enpresa. Horiei IKEA, MegaPark, Ballontiko kaleratzeak gehitu behar zaizkie, eta Bide-Onerako EREa. Eta nola ez, itxi diren ehunka denda eta saltoki txikiak. Ehunka familia kaleratuak izan dira beraien etxebizitzetatik. Datu hauek guztiak lotsagabekeria sozial eta politikoaren muturra besterik ez dute osatzen, urrutitik datorren  lotsagabekeria.

Azken 35 urteetan, Madril eta Gasteizko gobernu ezberdinek harturiko erabakiek, momentuko udal gobernu ezberdinen laguntzaz, industria eta produkzio ekonomiaren  desagertzea ekarri dute; fabrika eta tailerren ixteak, merkataritza guneak bultzatzea, denda txikiak itotzea, beharrezkoak ez diren azpiegitura lan izugarriak, etxebizitzen prezio beldurgarriak,, lehen sektorearen aurrez pentsatutako desagertzea … Multinazional, espekulatzaile, bankari, eta morroi diren politikarien onurara eskualde osoa eraldatu dute. Politikari hauek hori egiteko legeak eskura utzi dizkiete.  Eta orain, beraien krisi sistemikoa gogortu denean, egoera zorroztu besterik ez dute egin; lan erreforma etengabeak, EREak onartu, lanpostu eta etxebizitza kaleratzeak, laguntza sozialen murrizketak … Beraien sistemaren krisia estutzen ari den bitartean, eskaintzen duten irtenbide bakarra, gure eskubide sozialen murrizketa da. Horixe da beraien plan zoragarria, aurrera ihes egitea, terrorismo soziala zabalduz. Izan ere, terrorea, izua zabaldu nahi dute langileon artean, errekurtso gutxi duen jendearen artean, gure eskubideen murrizketa gaitz erdi har dezagun.  

Ezkerraldean, gure eskubideen aldeko ehunka aldarrikapen eta borroka bizi, sortu, sufritu, eta metatu ditugu. Eta gaur egun, Ezkerraldearen geroaren alde, horretan jarraitu behar dugu, indarrak bikoiztuz. Baina hori bai, egoera hau gainditu dezakegu. Horretarako, beharrezkoa da, akordioak lortzea; akordio politikoak, akordio sindikalak eta akordio sozialak; justizia sozialean oinarrituko den eredu alternatibo berri baterantz jotzeko beharrezkoa den botere politikoa lortzeko. Gure eskubide sozialen, gure duintasunaren eta publikotasuna mantentzearen aurka dauden eragileak, hau da, egoera jasangaitz hau sortu dutenak eta beraien konplizeak, interpelatzeko eta beraien burua kokarazteko beharrezkoak dira aipaturiko akordioak.

Ezin gaitezke konformatu eta ezin dugu ekaitza noiz baretuko zain egon. Kalera irten beharra dago, agerraldiak egin, gune sozialak irabazi, eragile aktibo bihurtu, beharrezkoa den erantzun soziala zabalduz, sozializatuz eta sakonduz. Erantzun sozial honek jasotzen ari garen eraso larriaren adinakoa izan  behar du. Hori dela eta, Ezker Abertzaletik herritar orori dei egiten diogu hainbat sindikatu eta erakunde sozialek eginiko deialdian parte har dezan. Manifestazioa ostiral honetan, otsailak 17, Bide Oneran arratsaldeko 19:30ean  hasiko da. Ezkerraldeak eta Euskal Herriak beste eredu ekonomiko eta sozial alternatiboa behar dute, pertsonek eta pertsonentzat eraikia, gure erabakietatik hasita, hortxe dago gakoa eta horretan eman behar dugu indarra.

Ezkerraldeko Ezker Abertzalea, 2012ko otsailaren 16a.

Iruzkinak (0)

Iruzkina idatz ezazu

Izena

Iruzkina

laburra | luzea

Iruzkin berria